Mio madre nun sabía idiomes
pero yera tan mimosa...;
dicíame que con enfotu
pues algamar cualquier cosa.
Mio madre nun sabía idiomes
pero falaba a les freses,
facía ensalada rusa
y mil tortielles franceses.
Mio madre nun sabía idiomes
pues pisó poques escueles,
¡Y facía un caldu gallegu
y unes coles de Bruseles...!
Mio madre nun sabía idiomes,
yera una madre estupenda
facía arroz a la cubana
con salsa a la boloñesa.
Dempués de lleer estos versos, ¿nun vos dan ganes de siguir hasta'l puntu final? Doi cuenta que la esperiencia ye perguapa.
Mio ma foi poco a escuela, pero cuando-y lleí esti poema entendiólu y díxome cuasi emocionada: "¡Qué guapu!", porque alcordóse de la ma, mio güela, y del arume a primavera na cocina cuando picaben les freses pa comeles con lleche y zucre; de les manes masando pan de boroña o faciendo una empanada bonitu pa comela na playa que taba a la vera casa; o d'aquella mermelada piescu fecha nos calderos de cobre que vendíen los caldereros de Miranda.
Y entemecíos col ruíu la cacía, el calor del llar y el sabor d'aquellos platos taben los besos de mio güela pa los sos cinco fíos.
El poema d'Aurelio fizo despertar en mio ma tolos recuerdos y toles emociones que vivió con aquella muyer que peñaba moñu y trabayaba la tierra, que sabía curar coles caricies y despertar los suaños con histories guardaes na memoria de la cultura popular.
Como fíos que fuimos o que somos, siempre vemos nelles "un mapamundi d'amor".
