PRESENTACIÓN DE DEVA Y EL PITÍN

A un home sentáu nuna tayuela mordiólu un perru. Esta ye la solución de la cosadiella d'ayeri.

Cuntavos tamién qu'esti vienres a les 20h. nel Salón d'actos de Servicios Sociales de Castrillón na cai Rei Pelayo 27, va tener llugar la presentación de Deva y el pitín d'Ester García con ilustraciones de Tina García y espubizáu pola editorial Pintar-Pintar

Un día'l pitín Manolín cuénta-y a Deva la so amiga, una historia que-y pasó na caleya.

"Siendo yo mui pequeñín,

cuasique como un dedal,

perdíme cerca la viesca

por sentame a escucar.

Pío, pío,pío, pío.

pío, pío, pío, pa.

Bua, bua, bua...


Cuando vi que taba solu,

encomencé a llorar.

Y lloraba, suspiraba...

¡Nun paraba de piar!"


¿Por que llores Manolín? entrugáron-y un palombín, un coríu y un pavu como un xigante.

"-Que toi triste, toi pertriste.

¡Perdíme de la mio ma!

Allegóseme una pita,

y entamó a cacarexar.

- Soi la pita Margarita,

yo sí sé onde ta to ma.

Llevóme camín abaxo,

hasta llegar a un bardial

y entamó a ponese fea,

y los güeyos a brillar.

Y dábame unos picotazos...

¡El picu entamó a medrar!

-Soi la bruxa Margarita

¡Engañete!

H.a, h.a, h.a"


Manolín tuvo muncha suerte poque nesi momentu pasó per ellí un faisán.

"Y tiró-y una bolina

del xardón de La Fuñal.

¡Quitó-y tolos sos poderes!

¡Nun podía nin falar!"



El faisán dio-y al pitín unos miminos y llueu llevólu enriba les sos ales hasta onde taba la ma.

El vienres la Biblioteca Canellada grabará a Esther García recitando esti poema que ta dedicáu a Deva y a Nora, hermanines y amigues del pitín Manolín y a tolos neños que saben mimar a los animales.

L'ASTURIANU NUN YE UNA IMPOSICIÓN

El día 10 de marzu lleíamos nel diariu dixital asturies.com: "Consuelo Vega: los ciudadanos nun quieren imposiciones col asturianu". Güei tamos a día 15 y entovía siguimos rumiando la noticia porque nun somos quien pescanciala.

La pallabra "imposición" ye más corriente sentila ente la xente que ta a la escontra de la normalización. Los que lluchamos pa que la Llingua Asturiana (ferramienta de comunicación y seña d'identidá) nun tea en peligru desaniciu enxamás falamos d'imposición, sinón de derechos llingüísticos.

Derechu a dirixise a l'Alministración ensin torgues; derechu a deprender la Llingua Asturiana en toles escueles dende los primeros años; derechu a que tea presente nos medios de comunicación onde vive una situación marxinal; derechu a...

L'asturianu nun ye una amenaza. La xente que nun tenemos reconocíos los nuesos derechos llingüísticos sí que nos sentimos amenazos. Amenazaos a escribir y falar nuna llingua que sí ye una imposición.

II XORNAES DE LLINGUA ASTURIANA Y EDUCACIÓN

Suatea convoca les II Xornaes de Llingua Asturiana y Educación los díes 19 y 20 de marzu nel Centru Cultural d'El Llano en Xixón (Cai Ríu Oru, 37).

Podéis pinchar equí pa ver el programa.

PREMIOS DE LA MÚSICA

La Biblioteca Mª Josefa Canellada quier dar la norabona a Dixebra por esti premiu y les gracies poles sos pallabres reivindicatives pa la nuesa llingua. Y llamenta la falta d'educación, de respetu y la inorancia de la presentadora y de toos aquellos que sofitaron con aplausos les sos pallabres vacíes de conocimientu.

NORMES ORTOGRÁFIQUES

Podéis descargar en formatu pdf el llibru Normes ortográfiques de l'Academia de la Llingua Asturiana

APUNTES PA UNA HISTORIA DE LA LLITERATURA INFANTIL Y XUVENIL N'ASTURIANU

El día 4 de payares, nel Salón d'Actos de la Facultá de Filoloxía, l'escritor Vicente García Oliva faló sobre la Lliteratura Infantil y Xuvenil (LLIX).

PRESENTACIÓN D’ARROZ, AGUA Y MAÍZ

El sábadu 17 d’ochobre a les 13 hores na Casa Cultura Mª Josefa Canellada en Cabranes, va presentase porque asina lo quixo l’alcalde, (“fan” según él de Mª Josefa Canellada, pero no d’esta Biblioteca Virtual. Tovía nun sabemos por qué), el llibru de Berta Piñán Arroz, agua y maíz. La Biblioteca Virtual Mª Josefa Canellada, que nun tien nada que ver cola Biblioteca de Cabranes, tará presente nesti actu anque nun foi invitada; pero como va’l que quier, p’allá vamos cola nuesa cámara casera.

Arroz, agua y maíz ta asoleyáu pola Editorial Pintar-Pintar que dende l’añu 2005 ta demostrando una calidá mui alta nes sos ediciones (los sos llibros formen parte yá d’esposiciones n’España y Estaos Xuníos). Pintar-Pintar dende’l so entamu dexó al marxe prexuicios de calter llingüísticu asoleyando en billingüe (asturianu-castellán) dalgunos de los llibros del catálogu, lo mesmo qu’asocede con otres editoriales nacionales como ye’l casu de Kalandraka. La calidá del papel, de los testos y les ilustraciones podemos velu nesti poemariu de Berta Piñán, un viaxe per aciu los versos a Cuba, Madrid, Ucrania, Guatemala, Irán… siendo les neñes y los neños los protagonistes. La pallabra ye la voz de los mieos, los deseos, les esperances…

Versos que falen de la xuntanza cola tierra, el dexar de ser ún pa ser ella:

Soi’l maíz, soi la panoya,
tengo manes de simiente,
el mio piel ye sal de tierra,
los mios deos la pendiente.

Versos que s’alimenten colos suaños de la esperanza:

Cuando yo seya mui grande
voi llevar hasta’l mio pueblu
esa fonte y esi ríu
pa qu’ellí viven les vaques,
pa qu’ellí beban los críos,
y mio ma nun se canse
y pueda quedar conmigo

Entrugues sobre lo que nun podemos ver pero sabemos qu’esiste:

¿A quién lladren los perros
del otru llau de la frontera?


Versos que falen del agua qu’arrampla con too, hasta coles rises; versos con arume a azahar y a xazmín. Versos pa lleer una y otra vez.

Cada poema d’esti llibru ta acompañáu poles ilustraciones a doble páxina d’ Elena Fernández, ilustradora tamién de Malva y el paragües máxicu de Marisa López, y Cascoxu d’ Aurelio González Ovies.

Pa Perry Nodelman les ilustraciones siempre cambien el sinificáu de les pallabres al interpretales d’una manera específica, siempre nos cuenten una historia diferente y nesti sen podemos esfrutar d’otra llectura, la que fizo Elena dempués de lleer los poemes.

LES COSES QUE-Y PRESTEN A FRAN

Préstame sentame na cañiquera y contemplar los llibros que s’amontonen nos estantes y dende va tiempu nel suelu. Camiento que son una especie de fetiches que me faen sentime a gustu.

Nesti espaciu, que comparto con un hámster al que-y dexo la xaula abierta pa que sienta la llibertá y el sabor de la pechuga de pavu pola que mataría, tan los llibros de Berta Piñán, a la que pudi grabar nuna cai d’Uviéu onde quedó pal recuerdu’l ruíu que faen los coches del sieglu XXI y la moda nes bolses de la compra. Nesta entrevista Berta fala del llibru Les coses que-y presten a Fran. Cuando lu compré nun pudi, como ye costume, esperar a llegar a casa. Nel autobús entamé a lleelu queriendo conocer cuáles seríen les coses que-y presten a Fran y tamién, voi ser sincera, escaecer a tolos que falen pol móvil al altu la lleva cuntando la so vida nun tresporte públicu. De primeres gustóme’l llibru coles interferencies de los suxetos reales, pero volví lleelu cuando llegué a casa.

La historia fízome sorrir pola sorpresa del final que nun voi cuntar, sinón ú ta la gracia d’escribir esto. Porque esto escríbolo pa que vayáis a la biblioteca o la llibrería y garréis el llibru siguiendo’l mio exemplu.

La narradora ye una neña que confiesa yá na primera páxina que les dos persones que más quier nel mundu son mami y Fran. A Fran, al paecer présta-y pola vida que la neña- y diga: “quiérote, quiérote muncho Fran o boberíes pol estilu”. La voz d’esta narradora fai que conozamos a esti personaxe cola descripción de lo que-y gusta facer como ye achuchar a mami y dicí-y coses guapes, baillar na alfombra de la sala, cantar cuando va en coche, cocinar coses bien riques, salir a correr pel parque…Al empar, Fran comparte estes coses cola rapacina tresmitiendo nel relatu l’amor qu’ella siente na so casa: “A veces, cuando Fran achucha a mami, yo voi y pégome a les sos piernes pa que m’abracen a min tamién”; “pon música y fai esparabes colos brazos y espatuxa como na tele y a min al final, duelme la barriga de tantísima risa que me da”; “depréndime unos cantares que, la verdá, son como raros y diferentes de los que cantamos con Mila, la profe del cole”…

Como llector vas ver un cambéu nos roles sexuales a los que tabes avezáu. Mama yá nun queda en casa col mandil puestu. Anque tamién podemos pensar que pá yá forma parte de les estadístiques del paru y de les noticies sobre la crisis nes families españoles, y, por mor d’ello, Carlota esfruta de la so compañía ensin tener que quedar nel comedor de la escuela. Pero esto nun paez que seya asina porque Fran ta mui gayoleru pa tar viviendo esta situación. Vamos pensar entós que la lliteratura infantil entama a cambiar cuando nun presenta una familia tradicional. Anque’l cuentu presenta otra forma d’entender les rellaciones familiares entovía queda muncho por facer y aceptar nuna sociedá que vive escuchando los dictámenes de la Ilesia y con prexuicios morales.

Si queremos una sociedá diferente, la lliteratura ye una ferramienta perimportante na tresmisión d’idees. Ye bono tener una bona alimentación, pero la intelixencia y l’alma tamién deben alimentase y les pallabres son una fonte de llibertá y de conocimientu.

Na última páxina col fondu coloráu y la lletra blanca pa da-y más importancia a lo que se cuenta, podemos lleer: “Si me pongo a pensar, hai munches más coses que-y presten a Fran pero lo que nun-y presta nada de nada, que lo sé yo mui bien, ye…” Lo que va enriba los puntos suspensivos ta nesta fueya y ye la clave d’esti cuentu tan guapu con ilustraciones de Lucía Bande.

María Josefa Canellada

Esti blogue de La Biblioteca Virtual María Josefa Canellada naz col envís de crear una interactividá colos usuarios de la mesma.

La Biblioteca ye un homenaxe a una filóloga intelixente, trabayadora y humilde que siempre defendió la llingua asturiana magar que munchos negaron y nieguen la so esistencia argumentando que ye una llingua inventada pola Academia de la Llingua que nun fala naide; que nun hai un bable, sinón munchos; que ye un dialectu del castellán; que los que falen y escriben son unos pocos que quieren sacar unes perres nes subvenciones, etc.

Nós seguimos el conseyu qu'un día Mª Josefa dio a la filóloga y presidenta de l'Academia de la Llingua Asturiana, Ana Cano, no que cinca a estos comentarios: "Nun faigas casu, nun prestes atención, trabaya, qu'a la postre lo que va a quedar ye'l trabayu que faigas".

Vamos trabayar, vamos emplegar la llingua de los nuesos pas, de los nuesos güelos, de la nuesa tierra y vamos espardela pelos espacios de la rede onde nun hai fronteres llingüístiques.

M.ª Josefa Canellada dicía qu'un pueblu ensin biblioteca nun ye un pueblu, qu'una casa ensin llibros nun ye una casa. Nosotros pensamos qu'Internet ensin una biblioteca en llingua asturiana nun ye Internet.

Publicamos el documental N'alcordanza de María Josefa Canellada que ellaboró la Universidá d'Uviéu cola collaboración de la Conseyería de Cultura del Principáu d'Asturies. Dende equí, damos les gracies a les dos instituciones por danos l'autorización.

Primera parte:

Segunda parte: