QUIERO

Güei quiero comer una ensalada de colores qu'inunde'l corazón, un pexe que tenga dientro l'arume la mar y un xeláu enllenu de besos de chicolate.



Y dempués bien fartuquina, quiero que daquién me garre de la mano y m'enseñe nuevos llugares onde sentame a lleer un bon llibru, sintiendo'l calorín del branu.

CUENTEN

Cuenten qu'una estrofa namoróse d'un versu; que les consonantes y les vocales tienen una rellación namás de pallabra; que la oración condicional busca con desesperamientu una oración afirmativa pa sentise más segura dientro'l sistema llingüísticu; que'l suxetu quier camudar d'identidá pa ser más feliz; qu'al verbu lleer nun-y gusta l'imperativu; que les ilustraciones nun puen vivir ensin el testu. Y cuenten tamién que too ye posible.