Biblioteca Virtual M.ª Josefa Canellada - Blogue

LA NEÑA DE LES CUATRO UVES DOBLES

2011-01-07T23:17:00.005+01:00

Munches gracies a Xavier Frías Conde por regalame esti cuentín, dempués d'enterase qu'un amigu llámame La Neña de les Cuatro Emes.

LA NEÑA DE LES CUATRO UVES DOBLES

Ello yera una vegada una neña con coletes que se llamaba Willermina Wendy Wanadoo Willow.
Na escuela toos comentaben lo estraño que yera aquel nome.
Taba enllenu d’uves dobles.
Los collacios, por facelu más curtiu, llamábenla Wuwuwuwu. A la probitina de Willermina Wendy Wanadoo Willow nun-y prestaba un res. Sentíase como una páxina web perllarga.
Namás faltaba que daquién-y ficiere clic pa llanzase a navegar per Interné.
Por eso, preguntaba a los padres:
– ¿Qué pueo faer?
Ellos nun entendíen bien a qué se refería la neñina coles coletes estiraes.
– ¿Qué quies faer: un pastel de zreces, un castiellu macarrones, pinta-y bigotes al cuadru de la bisgüela? –entrugaben ellos.
La neña nun sabía cómo esplicar que nun-y prestaba gota'l so nome. Probitina.
Hasta qu'un bon día, xusto cuando faía diez años, los padres decidieron faer un viaxe dende Australia, onde vivíen, hasta Asturies, a visitar a los güelos.

Los güelos nunca vieran a la nietina, porque yá naciera n'Australia, colos padres emigraos.
Y cuando llegaron, los güelos como ye normal, comieron a chuchos a la neña. Yera tan guapina...
Entós la güela entrugó-y:
– ¿Y cómo te llames?
Ella diba dicir automáticamente aquello de Willermina Wendy Wanadoo Willow, pero nun pudo. Salió-y automáticamente:
– Mari Mar Martín Martín.
La güela sonrió.
– ¡Qué guapo! –dixo ella.
Los padres nun entendíen nada. ¿Cómo yera posible?
Miraron los documentos de la neña. Hasta nel pasaporte ponía Mari Mar Martín Martín.
Contaron a los güelos qu'inda n'Australia la neña tenía cuatro uves dobles nel nome, que nun entendíen cómo yera posible aquel cambéu.
Pero 'l güelu, que miraba pa ellos ensin dicir nada, esplicó:
– Ye normal, la W cuando vien pa esta parte del planeta tórnase nuna M, porque la verdá ye que la W ye una M pámpana arriba. Ye polo que la W cuando llegó equí, camudóse nuna M. Dempués, el nome quedó-y como tien que quedar.
Dende aquella esplicación, la neña pasó a ser pa siempre Mari Mar Martín Martín, como dicía 'l güelu, "Martín al cuadráu", anque la güela prefería "Martín bis".
Pero esa discusión, yá la contaremos otru día.

© Xavier Frías Conde, 6 xineru 2011

REIS MAGOS

2011-01-06T13:42:00.005+01:00

¿Tienen Reis los Reis Magos?

Un xueves pela mañana
alcontrábase’l rei Melchor
escribiéndo-yos una carta
a los Reis del Amor
Y dicía:
-Oh gran señor, rei Gaspar,
tu que yes el mio preferíu
¿traerásme cura d’amor
pa esti mundu tan feríu?

Llueu, un vienres pela nueche,
acabante de cenar,
escribió una carta nueva
al rei Melchor, Baltasar.
Y pidía-y, amorosu,
que traxera, por favor,
una cura milagrosa
con que sanar el dolor.

Y el rei Baltasar, pensando
qué-y podía pidir,
escribía al so rei magu
diciéndo-y dalgo ansí:
_Oh, queríu rei Melchor,
tu sabes cómo te quiero
¿podríes traeme, porfa,
unes cañes de romeru,
unos llibros de colores,
un globu con corazón
y una caxa de semientes
semientes de nueva flor?

Han de ser de flor de suaños.
Han de ser de flor d’amor.
Han de ser de flor de vida,
de flor de suaños en flor.

Y respondieron felices
nel so día los Reis Magos.
Y los tres Reis, los tres,
toos tuvieron regalos.

La maxa nun s’entretién.
Tu llámasla y ella vien.

Mª Rosa Serdio

Torna de Mar Martín

Munches gracies, Rosa

LOS TRES REIS MAGOS

2011-01-05T08:37:00.009+01:00

FELICES FIESTES

2010-12-31T11:56:00.002+01:00

FELICES FIESTES Y BON SOLSTICIU D'IVIERNU

DIN DAN. XENTIQUINA

2010-12-26T12:50:00.004+01:00

LA CARTA DE LOS DESEOS

2010-12-24T15:56:00.009+01:00

Deseo que la estrellina colorada allume’l camín a los indíxenes p’algamar la pallabra, la tierra y la llibertá.

Deseo la desapaición de los exércitos, escueles de muerte y destrucción.

Deseo la caída de los muros que separen los pueblos.

Deseo que la poliya termine con toles sielles eléctriques y que les piedres asesines de muyeres enamoraes queden enterraes no más fonderu la tierra.

Deseo un repartu igualitariu de les riqueces pa que tol mundu tenga derechu a la educación, a la sanidá y a la vivienda.

Deseo la oficialidá de la Llingua Asturiana, porque ye un derechu y la identidá de la mio tierra, de la mio cultura.

PRESENTACIONES

2010-12-22T17:50:00.010+01:00

Mañana ye día de presentaciones. N'Avilés nel Palaciu de Valdecarzana a les siete de la tarde,Cristina Múñiz presenta'l so llibru de poemes pa neños Dingurindaines con ilustraciones

d' Enrique Carballeira y espublizáu pola editorial Asturtoons.

A la mesma hora y n'Uviéu nel Club de Prensa La Nueva España, la editorial Pintar-Pintar presenta:

Un susurru d'Aida Elizabeth Falcón con ilustraciones d'Alicia Varela.

Tía Clara d'Aida Elizabeth Falcón con ilustraciones de Sandra de la Prada.

Quiero mercar una hermanina de María Luz Pontón con ilustraciones de Francisco Pimiango.

Malva y el papapallabres de Marisa López Diz con ilustraciones d'Elena Fernández.

NORA LA NEÑA DE SAL

2010-12-14T18:14:00.029+01:00

La neña de sal lleva en caúna les lletres l’agua del ríu asturianu, que dende Sariegu hasta la desembocadura del Nalón suena pelos montes d’Asturies.

Nora nagua por tocar l’agua del mar, porque ellí l’horizonte nun s’alcanza ver y el rellume la lluna ye un suañu. Pero la rapacina tien una enfermedá enforma rara: tien el cuerpu de de sal y l’agua pue desfacela.

Cuando atapez, el pá garra les redes y el so calderu y marcha na so llancha a pescar. Él ye un pescador d’estrelles, estrelles rellumantes pa illuminar les cases o quicias l’alma de los que busquen los suaños tapecíos.

Ella siempre diba aína a la escontra d’él y elli siempre-y enseñaba la pesca; una montonera estrelles entá rellumantes, nun calderu enllenu agua.

Prestaríame tener una rede pa pescar la soledá, la tristura, los silencios y el dolor de tantos neños y metelos nuna llancha y llevalos bien lloñe a la tierra del olvidu.

Y esti deséu de mio, foi lo que fizo’l pescador cola tristura de la so neña pequeñina. Asina ensin importa-y un res el mal tiempu, garró les redes y el chubasqueru mariellu y coló a pesca-y el rellume la lluna pa vela feliz.

Echóse a la mar, que taba más brava que nunca. Les foles yeren munches y xigantes. Pero él yera bon pescador y nun tenía mieu, nin cuando la llancha baillaba una danza espantible ente foles.

Al riscar l’alba’l pá tornó a casa col rellume la lluna en calderu, pero la felicidá camudó-y nun dolor asitiáu no más fonderu l’alma. La persona que más quería nel mundu nun taba esperándolu. El desesperu apoderase d’él.

-¡Meca! ¿Qué-y pasaría a la mio fía?, ¿ónde tará?- y, esmolecíu por ello, púnxose a llorar y llorar, tanto berraba qu’espertó asina al rellume la lluna.

El rellume taba prisioneru nun calderu agua ensin saber porqué, lo mesmo que-yos asocede a munches persones a les que se-yos niega la llibertá a cambiu de la “felicidá” d’otros.

-¡Nun t’esmolezas pescador! Si me sueltes, yo puedo ayudate p’alcontrar a la to fía!

El rellume la lluna iluminó tola mar y dempués de tiempu’l pescador vio lloñe a la fía. Nora xugaba feliz pente les foles colos pexes y les tolines trasformada nuna sirena perguapa.

¡Nora nun sintiere enxamás l’agua na so piel de sal! Y magar que’l so cuerpu taba desfaciéndose, decidió cumplir ún de los sos deseyos más fondos, corrió y corrió, entainando, pa dir pa la mar a bañase.

Cuando sintimos el placer d’algamar un deseyu, sintimos al empar como dalgo acaba perdiéndose. Nora dexó de ser una rapacina pa convertíse en serena, una serena feliz nun como les qu’atopó Ulises que yeren unes malvaes.

Dicen que dende aquella l’agua la mar ye salao.

Nora la neña de sal de Fátima Fernández con ilustraciones S. Bimbo. Foi espublizáu pola Editorial Pintar-Pintar nel añu 2009.

Guía didáutica del llibru en pdf.

LA MANCADURA

2010-12-12T16:46:00.015+01:00

La tarde del vienres foi guapa abondo. Primero tuvi charrando delantre d'un cafetín cola mio amiga Mª Rosa Serdio y llue fui a la presentación del nuevu llibru de poesía La mancadura de Berta Piñán. Llegué de les primeres. Monstse Garnacho, Miguel Rojo y yo punxímonos a falar del Premiu Mª Josefa Canellada qu'esti añu algamó Montse, de la torna al catalán del cuentu ¿De qué tara fecha la lluna?, de les ediciones... mientres, Rafa colocaba dalgunes sielles na llibrería La Buena Letra. Nestes apaeció Carla Menéndez, l'autora del Mansín, el gallu montés de Tarna, y entamamos a falar de llibros ilustraos y a caciplar nos estantes qu'hai no fonderu de la llibrería. Ella sacaba un llibru, yo otru y cuando nos dimos cuenta nun veíamos nin la puerta. ¡Mamina, qué de xente! dicía Carla. La presentación entamaba y nós namás veíamos cabeces per detrás, quedamos de les últimes, pero ellí una al llau de la otra reímonos con Montse que fizo una presentación perbona como siempre y escuchamos dalgunos poemes de Berta ensin poder ve-y nin un rizu, nin los pendientes grandes y coloraos que llevaba.
Cuando finó la presentación, con muncha paciencia pudi averame a ella pa da-y unos chuchinos y entruga-y si-y quedaben pallabres pa escribime nel llibru. Berta ye perbona persona y perbona escritora, espero que dalgún día se-y reconoza'l so valir.
Al otru día presentó'l llibru n'Uviéu y ellí taba Mª Rosa que llevó la so cámara pa grabala cuando recitaba.

MIO MADRE

2010-12-09T09:22:00.004+01:00

Préstame abondo averame a una llibrería y maricar un poco mientres pienso: “¡Qué pena nun tener una montonera perres pa poder llevar pa casa tolos llibros que me peten! Esbabáyome toa pensando que me toca la Primitiva pa dexar de mirar los precios.

Pertenezo a esi grupu de xente raro que nun tien coche. Cuando toi cansada de caleyar nun me queda más remediu qu’averame a la parada’l bus. Ellí danme ganes de sacar el llibru, pero nun lo faigo, porque si llega’l bus y nun llevanto la mano nun para y dempués quedo con cara babaya, porque esa ye la cara que-y queda a la xente cuando lu pierde delantre les narices. Asina qu’espero xubir pa sacalu y meteme dientro.

L’otru día dalgo máxicu asocedió, dexé de tar na etapa de la madurez (de los venticinco p’alantre),como apaez nel llibru de Conocimientu del Mediu del mio fíu, pa tornar a la etapa de la infancia (dende’l nacimientu hasta los doce).
Y esti fecho asocedió cuando entamé a cañicame nos versos de Mio madre d'Aurelio González Ovies.

Mio madre nun sabía idiomes
pero yera tan mimosa…;
dicíame que con enfotu
pues algamar cualquier cosa.

Tengo la suerte de siguir conxugando los verbos en presente cuando falo de mio ma, ella nun foi muncho a escuela y nun sabe idiomes, porque daquella nun se falaba namás que’l castellán y falar n’asturianu yera falar mal anque yera perdifícil llamar d’otra manera al llabiegu, al cuquiellu o al caxilón que colgaba de la ferrada a la puerta casa.

Mio madre tamién m’alendaba cuando taba cansada y les lletres nun me salíen dándome besinos nos papinos coloraos y falándome con pallabres melgueres.

Mio madre nun sabía idiomes
pues pisó poques escueles,
¡y facía un caldu gallegu
y unes coles de Bruxeles…!

Metíme tanto dientro los versos que pudi sentir l’arume a caldu gallegu, a arroz a la cubana, a coles de Bruxeles y a bollos suizos, esos bollos que mio madre me preparaba bien untadinos con mantega de casa y zucre pa comelos a la hora’l recréu.
La comida facíase seliquín nes cocines de carbón y nos fornos cocíase’l pan, un llabor de les muyeres de la casa.
Los versos de Mio madre son el sabor y l’arume de la comida de casa, de los sabores de la infancia.

Nun sabía idiomes, ¿y qué?,
yo ponía-y en too un diez.
cosía faldes escoceses
y texía puntu inglés.

Dempués de lleer esto acordéme cuando nos díes fríos d’iviernu mio madre texía xerséis pal mio hermanu y pa mi pa que fuéremos bien abrigadinos, porque equí nesta tierra del norte la humedá entra pelos güesos.
A mi tampoco m’importaba que nun supiere idiomes, porque en cada platu taba l’esmolecimientu de teneme bien alimentada, en cada puntu inglés escondíase’l calor de les manes y en cada mirada tol amor.

Son los versos de Mio madre un cañiqueru de tenrura y un abellugu onde poder tornar a la infancia.

Esto ye lo máxicu de la poesía.

COSADIELLES Y OTRES HISTORIES

2010-12-08T12:13:00.023+01:00

L'escritor, ilustrador y etnógrafu Alberto Álvarez Peña cuenta que les cosadielles yeren una muestra d'intelixencia na Antigüedá. Asina na Grecia Clásica, la Esfinxe (un monstruu con cabeza de muyer y cuerpu de lleón con esnales de páxaru) proponía a tolos que llegaben a Tebas una cosadiella. Si nun yeren quien aldovinala, matábalos.

- ¿Quién ye l'animal que pela mañana tien cuatro pates, pela tarde dos y pela nueche tres?

- L'home. Atinó a dicir Edipo.

Alberto Peña recueye en Pulide (conceyu de Castrillón) el mesmu tema nun cuentu.

Diben per un camín el Diablu y l'osu y alcuentren un neñu gatiando

Osu: Oi, voi entrugate una cosa.

Diablu: Entruga, entruga.

Osu: ¿Ye esti l'animal que camina a cuatru pates más fuerte que yo?

Diablu: Non, esti será.

Siguen caleyando y alcuentren un paisanín mui vieyín con un cayáu.

Osu: ¿Ye esti animal con tres pates más fuerte que yo?

Diablu: Non, esti foi.

Siguen caleyando y el Diablu enséña-y a un home que ta trabayando de ferreru nuna fragua y díci-y: "Esi ye l'animal más fuerte, porque gracies al fierru la humanidá impúsose a la ñatura faciendo hachos pa valtiar los árboles y llances pa cazar y defendese".

Podéis lleer más histories nel llibru Garrapiellu de tradición oral asturiana.

Y si queréis escuchar más cosadielles equí tenéis a la escritora y profesora de secundaria Monstse Garnacho.

HAIKUS

2010-12-04T22:46:00.017+01:00

Goteras na cera

chapicando la calle.

Llantu de chuvia.

Sueña l'esbardu

que suerbe miel no cortín.

¡Dulzor dulcín!

Mar engafada.

Los pexes escuéndense,

la ouca canta.

El xardín floríu.

Remolinos d'arumes.

Güel a colores.

Del llibru Faraguyas d'Esther García López.

AIRE XELÓN

2010-12-03T10:39:00.008+01:00

Peles rodraes del cielu,

-zancada y zancobiellada-,

ente ñubarrones prietos,

y coles riestres del verde

l'aire xelón xugaba

socolliñando les fueyes

fresques na madrugada.

La primavera tovía

(vien despaciu) nun llegaba

y l'aire xelón sí llegaba.

La floriquina rosada

nun s'atreve abrir dafechu

les ventanines del alma,

ente'l verde aforfugáu

la color entrestalla.

Ente'l verde enfocicáu

la cabecina doblada.

Mª Josefa Canellada

Del llibru Antoloxía Lliteraria espublizáu por Alborá Llibros nel añu 2002.

RETAFILES

2010-12-01T10:09:00.007+01:00

Una vez yera un gatu
que tenía pies de trapu
y la cabeza al revés.
¿Contarételo al revés?

¿Contarete'l cuentu
de Perico Formientu
que foi cazar
y llevólu'l vientu?
-Sí
Yo nun digo "sí",
yo digo:
¿Contaréte'l cuentu
de Perico Formientu
que foi cazar
y llevólu'l vientu?
-Non
Yo nun digo "non",
yo digo:
¿Contaréte'l cuentu
de Perico Formientu
que foi cazar
y llevólu'l vientu?
- ...

Del llibru Garulla. Antoloxía del ritmu

CORRÉU

2010-11-28T11:28:00.008+01:00

Ayeri recibo esti corréu de María García Esperón, escritora y periodista mexicana.

Querida Mar:
Pensé mucho en ti en el Congreso de la Palabra. Uno de los empeños más loables y más difíciles en México es devolver la dignidad a las lenguas indígenas, que son despreciadas sistemáticamente, de las que se hace burla y motivo de vergüenza. Los hablantes de las lenguas indígenas esconden su saber, las hablan para dentro. Unos maestros indígenas del estado de Guanajuato hicieron un manual de la lengua chichimeca -hablada por poquísimos- y fueron a presentarla al Congreso. Mira: http://vozymirada.blogspot.com/2010/11/manual-de-la-lengua-chichimeca-en-el.html
Intercambiamos información, les hablé de ti, de la Biblioteca Canellada, de la fuerza de tus videos en pro del asturiano, etc. Les presenté tu blog como un modelo a seguir para afianzar su esfuerzo y su lengua. Ellos hablan castellano y chichimeca. La lengua chichimeca no tiene literatura, no tiene poesía. (Todo esto es consecuencia de la presión ofensiva a la que han estado sometidas las lenguas indígenas desde siempre) Les presenté la creación poética como una trinchera de defensa, les pedí que grabaran y subieran las grabaciones al blog que hicieran, en fin. TÚ ENTIENDES!

Manual de la Llingua Chichimeca.

ENRIQUE CARBALLEIRA

2010-11-25T16:41:00.024+01:00

Meyor nun echo cuentes de los años que fai que conozo a Enrique Carballeira, porque dende aquella los dos tamos un poco más vieyinos. Él foi'l que me fizo'l diseñu de la segunda edición de la páxina A la gueta los suaños que güei dirixe la mio amiga Iris Díaz Trancho.

Enrique convirtióse nel nueso ilustrador trabayando asyaga na páxina y ganando, como en tolos mios proyeutos, cuatro perres, pero'l trabayar cuasi de baldre ye mui bono pa facer amistá.

Va pocos díes mandóme un corréu pa contame que la versión n'inglés del cuentín Xilu tien mieu a la nueche asitióse nel Top 50 de los llibros más descargaos na tienda Apple.

Nun dexéis d'echar una güeyadina a la so páxina, porque ellí tán Nardo y Quina, Borsalino, Xilu, Pol, Marta la de les trences... y hasta Xaime Bon, un detective mui galácticu.

ENTREVISTA A CARLA MENÉNDEZ

2010-11-22T09:28:00.002+01:00

LA CAPARINA

2010-11-20T23:14:00.018+01:00

Torna del poema La mariposa de Mª Rosa Serdio

Sobre la zarza,

sobre la rosa...

¡Cómo madruga!

¡Va acibosa!

Pelos andenes

y peles víes

semando amores,

dando allegría.

Ente'l to pelo

y el to corazón

cuando tu tiembles

de la emoción.

¡Qué cadenciosa

de mañanina,

bailla nel tiempu

la caparina!

PREMIU MÁXIMU FUERTES ACEVEDO

2010-11-14T12:15:00.006+01:00

Damos la norabona al nueso amigu Vicente García Oliva pol Premiu Máximo Fuertes Acevedo d'ensayu.

Podéis lleer la noticia nel so blogue Trabayu de campu

CLASE NA CAI

2010-11-12T23:03:00.007+01:00

Mañana clase na cai pola Xunta de la defensa de la Llingua Asturiana.

Equí tenéis una clase de fai dos años.

YO DUERMO CON UN OSU

2010-11-11T09:34:00.024+01:00

Yo duermo con un osu de peluche

y mil monstruos a la vera la mio almuhada

enantes tenía-yos mieu,

agora nun me faen nada.

Viven nel mio cuartu,

embaxo la mio cama

y nel mio armariu que ta xusto na entrada.

Asina entama'l poema Yo duermo con un osu d' Antonio Acebal con ilustraciones de Borja Sauras. Ilustrador del poema Menú de versos d'Esther García y del cuentu ¿De qué tará fecha

la lluna? de Miguel Rojo. Toos ellos tán espublizaos pola editorial Pintar-Pintar.

POEMA DE Mª JOSEFA CANELLADA

2010-11-09T19:48:00.001+01:00

Poqueñín a poqueñín

Poqueñín a poqueñín
l'airiquín alitaba,
la fiebre esquitaba al posu,
el rapaz yá nun lloraba.
Per debaxu de los pinos
tresalecía la mañana.

Esti poema de Mª Josefa Canellada ta recoyíu nel llibru Antoloxía lliteraria, espublizáu por Ediciones Alborá nel añu 2002.

XERA DE MANSÍN

2010-11-08T22:36:00.007+01:00

Mansín de Carla Menéndez yá tien xera didáutica. Tracamundios, sopa lletres, animales en peligru d'estinción, la pita ciega, el cascayu... son dalgunes de les propuestes pa trabayar la llectura'l llibru.

Descargar en pdf

POEMA DE G. RENDUELES

2010-11-08T12:34:00.012+01:00

Nuechi de otoño poema d'Enrique García Rendueles podía lleese'l pasáu día seis nel blogue de la nuesa amiga la Biblioteca Concentaina. Ye emocionante ver como n'otros llugares esparden la nuesa llingua pela Rede. Y equí, na nuesa tierra, los políticos quieren arrequexala ensin tener una presencia digna nos medios de comunicación, na escuela, na alministración... Ye mui llamentable esta situación.

Y al otru llau de la mar, en México, María García Esperón escritora y periodista tamién amiga de nós, facía un videu d'esti poema.

Munches gracies a les dos polo que facéis pola nuesa llingua materna.

VICENTE GARCÍA OLIVA

2010-11-07T09:41:00.031+01:00

A Vicente García Oliva conózolu dende va años cuando tuvi la idea de facer la revista dixital pa rapacinos A la gueta los suaños que güei dirixe Iris Díaz Trancho. Acuérdome que lu llamé por teléfonu y dempués d'esplica-y el proyeutu terminé diciéndo-y: "Nun voi poder pagate nada, porque nun tengo perres". La respuesta foi: "Nun quiero nada, pues contar conmigo". La primera collaboración llevó'l títulu de: "Una ausencia bultable" . Dende entós la neña de les cuatro emes (María Mar Martín Martín), como asina me llama, tien muncho que agradece-y.

Vicente siempre tuvo a la mio vera, hasta dexóse grabar cuando lu llamé otra vez pa dici-y que taba pensando en poner en marcha esti proyeutu. Ficimos la primera grabación nel salón de la so casa y hasta preparó la presentación d'esta Biblioteca fai dos años nel Antiguu Institutu de Xixón.

Nestes Xornaes d'Estudiu convocaes pola Academia de la Llingua Asturiana taba sentáu ente'l publicu escuchando atentu a los ponentes ente los que taba yo, la so neña. De lloñe pudi ver una sonrisa de complicidá. Cuando llegué a casa y miré'l so blogue atopé esto: "El valir d'una Biblioteca". Les llárimes d'emoción ficiéronme facer una posa. Gracies Vicente por tar siempre ehí, por reconocer el trabayu y por animame a siguir nesti proyeutu que nun tien reconocencia oficial, pero sí'l cariñu de la bona xente como tu.

Munches gracies.

MUNCHES GRACIES

2010-11-04T23:32:00.003+01:00

Munches gracies a tolos que tuvistéis presentes ayeri nes Xornaes d'Estudiu convocaes pola Academia de la Llingua Asturiana.

Munches gracies tamién a los qu'aportaron idees pa meyorar esti proyeutu y a tolos que cada día piquen a esta puerta virtual.

XORNAES D'ESTUDIU

2010-11-01T10:19:00.005+01:00

La Biblioteca Mª Josefa Canellada participará nes XXIX Xornaes Internacionales d'Estudiu de l'Academia de la Llingua Asturiana qu'entamen mañana na Facultá de Filosofía y Lletres de la Universidá d'Uviéu. Podéis ver el programa en pdf.

MONTSE GARNACHO

2010-10-31T11:10:00.007+01:00

Damos la norabona a la escritora Montse Garnacho pol Premiu Mª Josefa Canellada. Pespuntes ye la obra teatral d'esta tercera edición.

CALABACES

2010-10-29T09:42:00.019+02:00

Dende va díes podemos ver nos estantes de munchos comercios calabaces, disfraces de bruxes, llambionaes de pantasmes, etc.

Mio pá nació un añu enantes de la República nel Conceyu de Castrillón y acuérdase cuando yera neñu de ver a la xente garrando calabaces pa face-yos unos güeyos, una nariz y una boca pergrande. Dientro metíen una vela y poníenles nes muries de les cases pa dar mieu. A otros prestába-yos más vistise con una sábana y mangar la calabaza enriba la cabeza.

CASTAÑES

2010-10-26T20:15:00.035+02:00

Yá tamos nel tiempu les castañes, alimentu perimportante na dieta de los campesinos asturianos per munchos años. Güei siguimos comiendo castañes de munches maneres, por exemplu preparando un pote como fai Milio'l del Nido

Nun voi siguir per esti camín, porque tendría muncho que contar sobre les castañes, pero nun sería lo correuto pa un blogue d'una biblioteca dedicada a la Lliteratura Infantil y Xuvenil.
De lo que quiero falavos ye de dos llibros que vienen a cuentu: Soi una castañal y El casu Pili C

En Soi una castañal, la protagonista cuenta cómo ye'l so raigañu, el tueru, les fueyes, el frutu y hasta lo que-y asocede nes distintes estaciones.

Pel branu, como tengo tantes fueyes, doi bona solombra.

Siempre toi entretenía viendo los xuegos de los neños y les neñes, oyendo los cancios de los páxaros, el motor de los tractores...

A la mio vera tengo dalgunes hermanes, xuntes facemos una viesca que se llama castañéu

La castañal cuenta tamién una historia qu'asocedió a un pá y a la so fía cuando xubíen pal monte y pasaron a la so vera.

Neña: Mira, pá, esa castañal perdió una caña perguapa, enllena frutos.

Pá: Ye verdá, sería la truena. Con una madera tan fuerte y durable nun la podemos dexar tirada en suelu.

Neña: Entós, ¿Llevámosla pa casa?

Pá: Sí, al tornar. Ehí nun val pa nada.

Neña: Y, ¿qué camientes facer con ella?

Pá: Pues prestaríame camudar los...

Los puntos suspensivos ye pa que vayáis corriendo a lleer el llibru pa saber en que termina convertida la caña de la nuesa protagonista.

El casu Pili C ye un casu especial.

Pili Castañón, Pili C pa los collacios, ye una castañina fía de doña María Castaña Imedia y don Xuaco Castañón. Hasta'l mes d'ochobre vivía mui feliz colos sos pas y dalgunos frutos de la seronda nel horru Trisquel Allegre. Digo vivía porque Pili C ta desapaecía, el casu llévalu don Durón d'Arroes. Les últimes noticies que tenemos d'ella son les declaraciones de la so amiga: "Na tarde d'ayeri tuvimos xugando a policíes y lladrones. Yéremos Solarina Picona Rayada, De la Riega, Pili y yo. Nós facíemos de lladrones y Pili de Policía, polo que fuximos a tou meter y, como ella tardaba dicidimos dir ver qué-y pasaba, pero yá nun la atopamos".

NUEVU LLIBRU DE CARMEN GÓMEZ OJEA

2010-10-24T11:27:00.018+02:00

Sol nena y pitín espublizáu pola editorial Pintar-Pintar.

Ver el videu del llibru.

II XUNTA D'ESCRITORES YA OUTROS PROFESIONALES

2010-10-22T15:56:00.007+02:00

Mañana a les 10h. entama en Cadavéu na Casa Natal del Padre Galo, la II Xunta d'Escritores ya outros Profesionales. La lliteratura escrita pa rapacinos y xente mozo va ser la protagonista.

A les dos de la tarde podéis tomar unos pinchinos y un vinín. Equí tenéis la programación:

PROGRAMACIÓN

MONTESÍN

2010-10-21T22:12:00.001+02:00

Montesín ye'l primer cuentu pa rapacinos escrito n'asturianu. Nel añu 2002 la Conseyería d'Educación y Cultura espublizaba pal Día de les Lletres Asturianes el llibru: Mª Josefa Canellada 1913-1995. Severino Antuña escribió un artículu perinteresante que lleva'l títulu: "María Josefa Canellada: l'orixe de la lliteratura infantil y xuvenil n'asturianu" y que podéis lleer equí.

Seis años dempués l'equipu de Nomes d'Asturies de la RPA que coordina l'escritor Chechu García, facía un guión dedicáu a Mª Josefa Canellada. Los medios de comunicación n'Asturies tán empeñaos n'arrequexar la Llingua Asturiana. Asina y too gracies a xente que trabaya cuasi de baldre y que nun son contrataos pola cadena, faen posible l'espardimientu de la llingua y la cultura asturiana.

¡Qué vos preste!

Escuchar el programa

CARLA MENÉNDEZ

2010-10-19T09:41:00.005+02:00

Asina foi la presentación de Mansín de Carla Menéndez.

FACIENDO ALCORDANZA

2010-10-17T11:39:00.035+02:00

Ayeri tuvi en casa los mios pas. Diome por entrar nel desván a maricar un poco. Ente moñeques atopé esti llibru de cuando diba a escuela, ye del añu 1972. A mi tocóme la dómina del güelu Paco faciendo de les suyes.

Nes ilustraciones podemos ver los prototipos qu'entovía siguen presentes na lliteratura pa rapacinos: pá lleendo'l periódicu, ma texendo, la maestra con gafes, porque ye la que llee y eso paez qu'estroza la vista, etc. Ente les aventures que protagonicen dos neños y una neña (Moncho,Toni y Mina), podemos lleer dos poemes de Gloria Fuertes: "La gallinita ciega" y "Los peces van a la escuela", unu de Mª Elena Walsh: "El gato confite"; y otru de Nicolás Guillén: "Un son para niños antillanos".

Esta ye la torna de la historia: "El cuento de Toni". Quiero compartila pa enseñavos lo que lleía daquella.

Un carniceru perdió un filete de la que diba a la ciudá.

Un perru, un gatu y un osu, que pasaben pel camín atoparon el filete. El perru que yera'l más vieyu dixo:

- Esti filete será pal que tenga más años.

El gatu dixo:

Yo tengo diecisiete y va ser pa mi.

El perru glayó:

-Yo soi'l más vieyu de los tres, porque tengo ventitrés.

L'osu punxo la so pata enriba'l filete y dixo:

-Yo namás tengo siete, pero, ¿quién ye'l valiente que me lu quita?

ASTURIES EN LIBER

2010-10-15T13:10:00.006+02:00

Quedamos ablucaos dempués d'escuchar les pallabres de la Presidenta del Gremiu d'Editores d'Asturies. ¿Como sofiten les instituciones a los llibros editaos n'Asturies y n'asturianu na feria de Liber? Cola ausencia.

SUBVENCIÓN DE LA CONSEYERÍA

2010-10-14T22:55:00.006+02:00

La Biblioteca Mª Josefa Canellada arrenuncia a la subvención de la Conseyería de Cultura y Turismu del Principáu d'Asturies. Asina y too, siguiremos trabayando nesti proyeutu porque consideramos perimportante l'espardimientu de la Llingua y la Lliteratura n'Interné.

LES PUERTES DEL PARÍSU

2010-10-14T16:11:00.005+02:00

El vienres 15 d'ochobre a les 19.30 h. na llibrería La Pilarica (Cai Valeriano Miranda 5, Mieres del Camín) va presentase'l llibru Les puertes del paraísu d'Ismael Mª González Arias. II Premiu Mª Josefa Canellada de Lliteratura Infantil y Xuvenil.

La Biblioteca nun ta invitada a esti actu siguiendo la costume de la Conseyería de Cultura.

PRESENTACIÓN DE MANSÍN

2010-10-12T11:28:00.009+02:00

Mañana miércoles 13 d'ochobre a les 19:30 h. na Sala de Conferencies del Antiguu Institutu de Xixón, va presentase Mansín, de Carla Menéndez Fernández y espublizáu por Trabe

Esti gallu montés fai de too: xuega al fútbol meyor que Casillas, al cascayu y a la pita ciega nun hai quien lu gane, en chigre tien llocos a los paisanos cada vez qu'enseña les cartes... Hasta tengo mieu qu'echen a Arguiñano de la tele pa metelu a él, porque según cuenten fai unes marañueles que son pa rellambese.

¡Esti gallu ye'l demoniu! Tenéis que dir conocelu mañana.

AXENDA DIDÁCTICA

2010-10-07T23:24:00.009+02:00

Yá podéis echar una güeyadina a los conteníos de l'Axenda Didáctica Escolar pal cursu 2010-2011.

Propuestes pa primaria. Pdf

Propuestes pa secundaria. Pdf

UNA TARDE CON ROSA

2010-10-03T22:37:00.022+02:00

Marrón de la mio tierra

marrón el café.

Marrón de castañes

ye marrón glacé.

Estos versos pertenecen al llibru Colores y más colores de Mª Rosa Serdio. Pasaron yá unos meses d'aquella entrevista na llibrería Cervantes n'Uviéu y dende entós nun dexamos de tar siempre al quite la una de la otra. Esti vienres Rosa regalóme una tarde per Xixón.

Pasamos dos hores delantre d'una taza té falando de milenta coses: de los sos escolinos, de Lliteratura, de los recuerdos de la infancia, de María García Esperón, la nuesa amiga mexicana siempre atenta a toles actualizaciones d'esta Biblioteca... Y tratamos de buscar una esplicación a cómo ensin conocer malpenes a una persona tienes la sensación de conocela de tola vida.

Dempués del té fuimos a una tienda de flores y cuando entramos pela puerta, Rosa dixo:

- Güel, Marita ( A veces llámame asina y a mi préstame)

- Alcuérdate que l'arume nun se pue mercar, contesté-y

Asina y too, ella mercóme unes flores pa que llevare pa casa un poco del arume d'aquella tienda.

A veces les tardes tienen dalgo máxicu. Ye guapo tener a una persona al llau cola que poder falar de la vida y ver siempre nella una sonrisa cuando disfruta coles pequeñes coses como meter les manes nun cestu enlleno fabes o abrir un perfume de llavanda y suañar que ta na Provenza... Ye guapo deprender de xente como Rosa, una muyer mui especial.

Gracies por esa tarde de seronda ente pallabres y rises.

VOI PINTAR

2010-09-18T21:02:00.015+02:00

Güei voi pintar un tanque disparando llambionaes de colores y una maleta enllena llibros pa escondeme ente dalgún versu cuando toi xugando al esconderite, o echame pámpana arriba nos puntos suspensivos.

Y voi borrar a tolos soldaos porque nun pescancien un res el sentíu la vida. Y tamién a los qu'emplegando'l poder manden bien lloñe a aquellos que son diferentes porque falen otra llingua y tienen otra cultura. Y si me queda goma, borro a los intolerantes qu'aplauden eses decisiones porque a mi gústenme los diferentes.

Grabamos la clase de M.ª Rosa Serdio

2010-09-15T22:37:00.001+02:00

SEMEYES DE LA CLASE DE Mª ROSA SERDIO

2010-09-14T17:36:00.033+02:00

Fai unos díes tuvimos nel colexu Elena Sánchez Tamargo na clase de Mª Rosa Serdio, l'autora de Colores y más colores.

Los escolinos d'esta maestra que llee y que sabe tresmitir la pasión pola llectura tienen muncha suerte de pasar los díes nesti espaciu onde s'escuenden milenta histories, onde la música ye la compañera de los llabores, onde güel a paz, a tranquilidá y onde una campanina avisa que les fueyes de los árboles tán esperando la llegada de la seronda.

Al llau de la puerta podemos ver una semeya de Rosa y un poema escrito n'asturianu.

La puerta siempre ta enllena d'información.

Estos son dalgunos de los munchos llibros que podemos alcontrar.

Nel fregaderu.

Nes cestes al llau de les plantes.

Dientro los armarios...

Esta ye la mesa de la maestra

Enriba la mesa siempre hai fueyes, llibros, una cámara pa recordar un momentu prestosu...

Enxamás falten los llapiceros.

Esti ye'l requexu'l té y les galletes.

La campanina la ventana lleva dientro la música de los montes de La Pola Llaviana.

MALVA Y EL PAPAPALLABRES

2010-09-06T21:01:00.003+02:00

TÍA CLARA

2010-08-23T11:26:00.002+02:00

PON, PITINA

2010-08-14T23:16:00.009+02:00

Pon, pitina, pon,

los güevos nel caxón.

Pon, pitina, pon,

que pa ti nun son.

XUEGOS INFANTILES. GUIÓN DE RADIO

2010-08-14T10:44:00.004+02:00

Programa dedicáu a los xuegos infantiles emitíu nel programa Nomes d'Asturies que coordina l'escritor Chechu García.

Ir a descargar

EL CAÑICÓN

2010-08-12T18:30:00.005+02:00

El cañicón ye una canción perguapa del grupu musical Xentiquina

MIRANDO

2010-08-07T09:29:00.041+02:00

Col sentíu la vista podemos percibir lo que ta alredor, pero munches veces nun mos paramos a mirar, ye dicir, nun diriximos el sentíu de la vista hacia daqué o daquién con procuru, con detalle. Asina que, nun ye lo mesmo ver que mirar.

A mi préstame muncho mirar les ilustraciones qu'alcuentro n'Internet ya imaxinar histories. Voi enseñavos dalgunes.

Mirando esta ilustración puedo imaxinar que ye iviernu y que fai muncho fríu porque lo qu'hai na taza echa fumu, el neñu ta con un piyama de felpa, d'esos que dan calorín y pa enriba tien la cabeza tapada cola manta. Imaxino tamién que ye de nueche porque una estrellina azul illumina les pallabres.

Los oxetos que tán a la so vera falen d'él. Dicen que ye un llambión porque-y presta comer pastes con pepitines de chicolate que-y prepara la güela y moyales na taza del so dinosauriu favoritu que mercó nel Muséu Xuráxicu d'Asturies una tarde de branu.

Ye un neñu intelixente que tien la necesidá de lleer pa pasalu bien y pa saber sobre dellos temes. Camiento que-y gusten los llibros d'Astronomía y siéntese a gustu teniendo al osu al llau col que comparte los suaños nocturnos y lliterarios.

Mirando los güeyos d'estos neños, imaxino que tán namoraos y que sólo ella atina a entamar una conversación que col pasu'l tiempu alcontrarán babaya del too.

NEÑA: ¡Cómo me gusten esos tres pelos que te salen pente la gorra!

NEÑU: (Risa nerviosa) Pues a mio ma nun-y presten un res. Amenázame con mete-yos tixera, diz que son tan rebeldes como yo.

NEÑA: ¿Tu sabes por qué los tos pelos son lisos y los mios rizaos?

NEÑU: Non, ¿por qué?

NEÑA: La culpa ye de los folículos.

NEÑU: (Cola voz temblando) ¿Los foli qué? ¿ Son espíritus del mal? Nun m'apavories.

NEÑA: (Rises) Non, nun t'esmolezas. Son los furaquinos que tenemos na piel. Cuando un pelu crez pasa al traviés del furaquín. El to furaquín ye redondu por eso tienes el pelo liso

NEÑU: ¡Meca! ¿Y el tuyu?

NEÑA: Cuadráu.

NEÑU: ¿Quién te contó eso?

Estes flores fueron cortaes fai unos minutos coles tixeres que lleva esta neña nel bolsu'l vistíu. Güei ye'l cumpleaños del pá. Ella piensa que nun hai meyor regalu que l'arume les flores acompañáu d'unos rebulguinos na barba y unos besinos na frente onde ta fuera de peligru de tragar dalgún pelu.

El gatín que ta al llau de la pierna de la rapacina ye hermanu del que ta ente les flores. Lleva yá un bon ratu buscándolu. ¡Probe! Ye una desgracia tener un hermanu col complexu de Narcisu.

QUIERO

2010-08-06T09:57:00.008+02:00

Güei quiero comer una ensalada de colores qu'inunde'l corazón, un pexe que tenga dientro l'arume la mar y un xeláu enllenu de besos de chicolate.

Y dempués bien fartuquina, quiero que daquién me garre de la mano y m'enseñe nuevos llugares onde sentame a lleer un bon llibru, sintiendo'l calorín del branu.

EL BARQUÍN

2010-08-04T09:47:00.007+02:00

Cuando yera pequeña mio pá poníame en cuellu y mirándome a los güeyos cantábame esta canción:

Había una vez un barcu pequeñín, que nun sabía, que nun sabía navegar.

Pasaron una, dos, tres, cuatro, cinco, seis selmanes y aquel barquín y aquel barquín navegó.

Siempre foi un misteriu cómo aquel barcu entamó a nevegar, pero lo importante foi que lo consiguió. Ensiguida deprendí que siempre hai que perseguir los suaños hasta facelos realidá, anque seamos pequeñinos como'l barquín.

Tengo la suerte de tener a mio pá a la mio vera, el meyor contador d'histories, del que sigo enamorada igual que cuando yera una neña.

ESCONXURU

2010-07-20T10:47:00.002+02:00

Sana, sana,
culín de rana,
si nun sanes güei,
sanarás mañana.

LA MIRADA

2010-07-19T11:29:00.004+02:00

De les cinco persones de la imaxe, namás una mira pa otru llau diferente. Quiciabes seya la más interesante.

COSADIELLES

2010-07-18T11:13:00.031+02:00

La mio picadura manca a esgaya

y el mio cuerpu ye pequeñín,

pero'l néctar que doi

comeislo nun tris.

Al prau pongo contentu

cola mio cara colorada,

el mio güeyu negru

y el mio vistíu verde.

Naz una vez al día,

muerre al atapecer;

y al otru día ehí lu tienes,

cuando anicia alborecer.

¿Qué cosa cosadiella ye,

del tamañu d'una nuez

que xube la cuesta

y nun tien pies?

¿Qué flor lleva les cinco vocales nel so nome?

Lleva años na mar y entá nun sabe nadar.

Tengo fueyes ensin ser árbol.

Fálote ensin tener voz.

Y nun me quexo cuando m'abres

a lo burrón.

NA GRANXA DE NEL

2010-07-11T12:49:00.011+02:00

NA GRANXA DE NEL

Na granxa de Nel
pasen coses mui rares
agora vais ver
mirái que vos paez.

El xatu fala inglés
les pites van en tren
y el gochu merienda
na mesa y con mantel.

El carru va al revés
baillen "ballet" los gües
y un par de coríos
trabayen nun hotel.

Un gallu que mercó
yá dibuxa perbién
y el burru, ¡qué burru!
cuenta de tres en tres

Esta canción ye del grupu musical Xentiquina, formáu por escolinos del colexu públicu de Lieres.

Montesín: guión radiofónico

2010-07-08T01:15:00.002+02:00

Ir a descargar

UN SUSURRU

2010-07-06T20:55:00.003+02:00

ESCONXURU

2010-07-03T20:22:00.004+02:00

Pola señal

de la santa canal,

comí tocín

súpome mal,

dexélu en platu,

llevólu'l gatu,

corrí tres d'él

hasta casa Miguel.

Cagóme na cama

pa ti y pa él.

XUEGOS INFANTILES IV

2010-06-29T15:55:00.043+02:00

Siguimos xugando.

EL CORRU

La neña queda fuera'l corru y el neñu queda dientro mentanto canten:

CORRU: Allabándome voi,

allabándome vengo,

la mio Maruxina,

en mio casa la tengo.

NEÑU: ¿Qué faes Maruxina?

NEÑA: Toi llavándome

CORRU: Estribillu

NEÑU: ¿Qué faes Maruxina?

NEÑA: Toi peñándome

CORRU: Estribillu

NEÑU: ¿Qué faes Maruxina?

NEÑA: Les farrapes

NEÑU: Guárdami delles

CORRU: Estribillu

NEÑU: ¿Guardástimeles?

NEÑA: Sí, pero comióles el gatu

Los del corru llevanten los brazos y el neñu echa correr pa pillar a la rapacina ente los arcos de los brazos.

LOS BANZONES

Hai que facer un furaquín en suelu pa meter los banzones dempués de ganar la posición, a base d'emburriar los de los collacios.

DEBAXO LA PONTE

Los xugadores asitiaos en círculu van tocando les sos palmes al centru y les palmes de los sos collacios a la derecha y a la izquierda mientres canten:

Debaxo la ponte,

sal de repente,

una burbuyina cola so cabecina

¿Verdá que suena bien? ¡Tilín, tilín, tilín!

¿Verdá que suena mal? ¡Tolón, tolón, tolón!

El que se ría o se mueva,

tien cara de melón o sinón de tontorrón.

Tolos xugadores faen de rir al restu amosando postures persimpátiques. Pierde'l que se ría o se mueva como diz la canción.

EL CASCAYU

Hai que saltar sobre un dibuxu fecho en suelu dempués de tirar una chapla o cachu teya, col procuru de nun pisar les rayes.

SALTAR A LA COMBA

A un saltu: "La una, la otra, la potra, el potrín, el potrón, la que pierda al rincón"

LA PEONZA

La cuerda de la peonza hai qu'enroscala d'abaxo p'arriba dexando per dientro un estremu, l'otru ye'l que ta sueltu p'amarralu. Hai que xirar la peonza dempués de soltar la cuerda tirándola esncontra la parte superior de la del contrariu. Gana'l qu'estroza la del otru.

El dinosauriu, la nena y la so ma - Miguel Rojo / Carlos Ál...

2010-06-23T08:53:00.001+02:00

RAMÓN LLUIS BANDE

2010-06-15T12:24:00.003+02:00

Ramón Lluis Bande falónos del so cuentu Historia d'un árbol ilustráu por Francisco Pimiango y espublizáu por Ámbitu.

MIGUEL ROJO

2010-06-14T17:49:00.005+02:00

Tuvimos con Miguel Rojo na llibrería Central de Xixón onde presentó'l cuentu El dinosaurio, el príncipe, la niña y su mamá. Aprovechamos l'actu pa face-y delles entrugues que podéis ver equí.
Dicivos tamién que'l cuentu podéis llleelu n'asturianu.

MIO MA, LA PIRATA

2010-06-13T22:28:00.005+02:00

Tuvimos na presentación del cuentu Mio ma, la pirata de la escritora y maestra Iris Díaz Trancho

MIO MADRE D'AURELIO G. OVIES

2010-06-08T23:34:00.003+02:00

Podéis pinchar equí pa saber más de Mio madre

PRESENTACIÓN. MIO MA, LA PIRATA

2010-06-08T12:20:00.007+02:00

El xueves 10 de xunu va presentase'l cuentu Mio ma, la pirata d'Iris Díaz Trancho con ilustraciones de Gloria Caamaño y espublizáu por Suburbia Ediciones.

L'actu tendrá llugar na Sala de Conferencies del Antiguu Institutu de Xixón a les 19.30 H. Intervendrán Iris Díaz y el maestru y escritor Xulio Berros.

XUEGOS INFANTILES III

2010-06-06T17:27:00.030+02:00

NEL ARCA DE NOÉ

Tolos xugadores en círculu van tocando les sos palmes al centru y les palmes de los collacios de la derecha y de la izquierda mientres dicen:

Nel arca de Noé,

caben toos, caben toos.

Nel arca de Noé,

caben toos menos ¡Tu!

Al terminar la rima, los xugadores señalen col deu a cualquier collaciu. Al qu'apunten más veces ye'l que pierde y queda elimináu. Va xugándose asina hasta que queden namás que dos xugadores que son los que ganen.

A LA ZAPATIELLA PER DETRÁS

Los xugadores siéntense en círculu menos ún que queda de pie cola zapatiella na mano dando vueltes per fuera'l corru, mentanto los que tán dientro dicen:

A la zapatiella per detrás,tris, tras.

El d'atrás nin la verá, tris, tras.

Mirái p'arriba, que caen morcielles,

mirái p'abaxo que caen escarabayos.

A dormir, a dormir, que la nueche yá ta equí...

(Los xugadores tienen que zarrar los güeyos)

-¿A qué hora?

- A les...

Quien tien la zapatiella diz una hora y los del corru tienen que contar al altu la lleva tantos númberos como diga, mientres dexa la zapatiella detrás de daquién.

LA PITA CIEGA

Un xugador tapa los güeyos y asítiase nel centru'l corru entamando esti diálogu:

- Pita ciega, ¿qué perdiste?

-Una aguya y un dedal.

-Da tres vueltes y los atoparás.

Los del corru ximielguen a la pita dándo-y tres vueltes. Darréu echen a correr. La pita tien que dir pillalos. Si ye a garrar a dalgún tien qu'aldovinar a palpu quién ye. Si acierta, el pilláu fai de pita.

EL CONEYU NUN TA EQUÍ

Tolos xugadores faen un corru garraos peles manes, menos el coneyu que ta fuera. Los de corru cancien:

El coneyu nun ta equí,

marcho pa Madrí...

¡Ai, ai, yá ta equí!

Cuando se diz la última frase'l coneyu ponse en mediu'l corru y diz:

- Faciendo reverencies tu besarás a quién te guste más.

El coneyu escueye a un xugador, da-y un besín y ésti pasa a ser el coneyu.

VIS VEO

Esti xuegu ye un diálogu ente xugadores. El que nun sabe lo que ta viendo l'otru entruga sobre'l color, la forma, el tamañu...

- Vis, veo

- ¿Qué ves?

-Una cosina

- ¿Y qué cosina ye?

LES PRENDES

Hai que tapar los güeyos a un xugador. El restu tien que-y dar coses y al garrarles tien que dicir:

De quien seya esta cosa tien que facer...

El propietariu tien que facer lo que-y mande.

EL SILLÓN DE LA REINA

Dos xugadores gárrense pelos brazos faciendo una siella onde se sienta un tercer xugador garrándose al pescuezu d'ellos. Cañíquenlu mientres canten:

Al sillón de la reina

que nunca se peña

un día peñóse

y el sillón...¡Rompióse!

Al dicir "¡Rompióse!" déxenlu cayer al suelu.

XUEGOS INFANTILES II

2010-06-05T19:34:00.010+02:00

PA ECHAR A SUERTES

Pin, pin,

zarabolín

lleva los gochos

al molín.

El molín

moler, moler;

el ratón

royer, royer.

-¿Cuánto me das

por esti ratón?

- Cien ducaos

y un doblón

y una mula

carretera.

Zape, gatu,

vete fuera.

Un gatu cayó nun pozu,

les tripes fixeron ¡gua!

Arremoto pitipoto,

arremoto, pitipá.

Una, dole, tele, catole,

quile, quilete,

taba la reina nel so camarote

vieno Vixil encendió'l candil

candil, candilón,

cuéntalos bien, que les venti son.

XUEGOS INFANTILES I

2010-06-04T10:18:00.026+02:00

Xugando desendolcamos les nueses habilidaes físiques y tamién intelectuales, al empar qu'afondamos nel emplegu de la llingua materna.

Nel añu 1997 el Conseyu de la Mocedá de Xixón espublizó un llibru guapísimu de Mª Xesús Llope y Xuan Porta tituláu Xuegos infantiles p'anguañu.

Nel entamu podemos lleer: "Los xuegos de los nños son ún de los aspeutos de la cultura asturiana que más presta conocer y estudiar. Esti aquel prestosu vien, en primer llugar, de que los xuegos son fenómenos culturales nos qu'aliten formes de vivir y de pensar propies d'Asturies. Pero, en segundo llugar, nos xuegos axúntase otra dimensión que los carauteriza: la diversión o la guapura (...) Otramiente, tolos xuegos como fenómenos culturales y sociales tienen unes carauterístiques comunes. Los xuegos son, siempre, formes mui poderoses de socialización. Dende otres perspeutives d'investigación los xuegos puen desempeñar funciones distintes, pero dende'l puntu de vista antropolóxicu'l valir socializador de los xuegos ye fundamental."

Cuando somos pequeñinos entamamos a xugar de la mano de la xente que forma parte del entornu familiar. Les rimes tan siempre entemecíes con caricies y cosquielles.

Musina, gatina,

saltó pela ventanina

comiendo pan y sardina

¡Dame un pocu!

Nun quiero...

¡¡Marramiaumiaumiáu!!

Nel xuegu de Los deos l'adultu va garrando caún d'ellos mientres diz:

Esti topó un güevu,

esti foi por lleña,

esti cocinólu,

esti pulgólu,

y esti comiólu,

por eso ta tan gordu.

Otru xuegu pa los más pequeñinos ye Los maderinos. Ponse al neñu en cuellu y garrándo-y les manines muévese atrás y alantre mientres se diz:

Aserrín, aserrán,

maderinos de San Xuan;

los del rei sierren bien,

los de la reina tamién,

los del duque:

truque, truque, truque.

Pa xugar a El burriquín ponse al neñu sobre una rodiya imitando'l movimientu un burru.

El burriquín

cuando va pal molín,

va al pasín,

al pasín, al pasín.

Y vuelve al trote,

al trote, al trote, al trote,

al galope, al galope, al galope.

De los xuegos siempre hai delles versiones, asina que si vos presta podéis escribínos un comentariu que será espublizáu nesti blogue.

MIO MA

2010-05-30T17:14:00.009+02:00

Mio ma ye'l títulu del nuevu poema d' Aurelio González Ovies ilustráu por Job Sánchez y espublizáu por Pintar Pintar.

Mio madre nun sabía idiomes
pero yera tan mimosa...;
dicíame que con enfotu
pues algamar cualquier cosa.

Mio madre nun sabía idiomes
pero falaba a les freses,
facía ensalada rusa
y mil tortielles franceses.

Mio madre nun sabía idiomes
pues pisó poques escueles,
¡Y facía un caldu gallegu
y unes coles de Bruseles...!

Mio madre nun sabía idiomes,
yera una madre estupenda
facía arroz a la cubana
con salsa a la boloñesa.

Dempués de lleer estos versos, ¿nun vos dan ganes de siguir hasta'l puntu final? Doi cuenta que la esperiencia ye perguapa.

Mio ma foi poco a escuela, pero cuando-y lleí esti poema entendiólu y díxome cuasi emocionada: "¡Qué guapu!", porque alcordóse de la ma, mio güela, y del arume a primavera na cocina cuando picaben les freses pa comeles con lleche y zucre; de les manes masando pan de boroña o faciendo una empanada bonitu pa comela na playa que taba a la vera casa; o d'aquella mermelada piescu fecha nos calderos de cobre que vendíen los caldereros de Miranda.

Y entemecíos col ruíu la cacía, el calor del llar y el sabor d'aquellos platos taben los besos de mio güela pa los sos cinco fíos.

El poema d'Aurelio fizo despertar en mio ma tolos recuerdos y toles emociones que vivió con aquella muyer que peñaba moñu y trabayaba la tierra, que sabía curar coles caricies y despertar los suaños con histories guardaes na memoria de la cultura popular.

Como fíos que fuimos o que somos, siempre vemos nelles "un mapamundi d'amor".

DEVA Y EL PITÍN EN PIEDRAS BLANCAS

2010-05-17T10:08:00.006+02:00

Pa la xente que nun pudo dir el vienres hasta Piedras Blancas a la presentación de Deva y el pitín, equí tenéis el videu. Sentimos nun poder llevar hasta onde tais unos bomboninos perricos que fizo l'autora.

PRESENTACIÓN DE DEVA Y EL PITÍN

2010-05-11T12:37:00.003+02:00

A un home sentáu nuna tayuela mordiólu un perru. Esta ye la solución de la cosadiella d'ayeri.

Cuntavos tamién qu'esti vienres a les 20h. nel Salón d'actos de Servicios Sociales de Castrillón na cai Rei Pelayo 27, va tener llugar la presentación de Deva y el pitín d'Ester García con ilustraciones de Tina García y espubizáu pola editorial Pintar-Pintar

Un día'l pitín Manolín cuénta-y a Deva la so amiga, una historia que-y pasó na caleya.

"Siendo yo mui pequeñín,

cuasique como un dedal,

perdíme cerca la viesca

por sentame a escucar.

Pío, pío,pío, pío.

pío, pío, pío, pa.

Bua, bua, bua...

Cuando vi que taba solu,

encomencé a llorar.

Y lloraba, suspiraba...

¡Nun paraba de piar!"

¿Por que llores Manolín? entrugáron-y un palombín, un coríu y un pavu como un xigante.

"-Que toi triste, toi pertriste.

¡Perdíme de la mio ma!

Allegóseme una pita,

y entamó a cacarexar.

- Soi la pita Margarita,

yo sí sé onde ta to ma.

Llevóme camín abaxo,

hasta llegar a un bardial

y entamó a ponese fea,

y los güeyos a brillar.

Y dábame unos picotazos...

¡El picu entamó a medrar!

-Soi la bruxa Margarita

¡Engañete!

H.a, h.a, h.a"

Manolín tuvo muncha suerte poque nesi momentu pasó per ellí un faisán.

"Y tiró-y una bolina

del xardón de La Fuñal.

¡Quitó-y tolos sos poderes!

¡Nun podía nin falar!"

El faisán dio-y al pitín unos miminos y llueu llevólu enriba les sos ales hasta onde taba la ma.

El vienres la Biblioteca Canellada grabará a Esther García recitando esti poema que ta dedicáu a Deva y a Nora, hermanines y amigues del pitín Manolín y a tolos neños que saben mimar a los animales.

COSADIELLA

2010-05-10T11:35:00.003+02:00

Cosadiella pa estruyase los sesos:

Tando dos pies
sentáu en tres pies,
vieno cuatro pies
y mordió a dos pies.
Entós dos pies
garró a tres pies
y tiró-ylu a cuatro pies.

Esta cosdiella tan guapa ta sacada del llibru Garulla. Antoloxía del ritmu de Vicente García Oliva y Severino Antuña con ilustraciones d'Olmo García.

La imaxe ye una pequeña pista. Mañana ponemos la solución.

MANIFESTACIÓN POLA OFICIALIDÁ

2010-05-09T16:28:00.004+02:00

5000 persones fuimos a la manifestación del vienres 7 de mayu. Podéis ver más semeyes pinchando equí

PRESENTACIÓN

2010-05-06T11:03:00.003+02:00

Mañana tendrá llugar na llibrería El Buho Lector d'Uviéu a les 18.30 hores, la presentación de la 2ª edición de Bruxes males, bones bruxes de Francisco Pimiango. Ellí tarán les tres hermanes Tula, Tela y Tila.

"Tula ye risona y nun tien parada. Tela, la hermana ximielga, ye como ella, pero más reposadina. De les tres hermanes, Tila ye la más grande y la más seria. Nun tien más afán que ganar la verruga na nariz pa ser una bona bruxa o, lo que ye lo mesmo, una bruxa mala".

Amás d'esta segunda edición de les bruxines, la editorial Ámbitu presenta tamién Historia d'un árbol del escritor y cineasta Ramón Lluis Bande con ilustraciones de Francisco Pimiango. Falaremos d'él dempués de la presentación.

¡¡¡OFICIALIDÁ!!!

2010-05-05T10:56:00.005+02:00

SER MAESTRU

2010-05-04T11:22:00.003+02:00

Muncha xente en Facebook dedícase a poner les fotos de les vacaciones, de les cenes colos collacios, de los fíos chupando'l deu, del coche que-y regalaron a la muyer el día de la madre... Toes elles van acompañaes de comentarios qu'a nosotros nun mos importen pa nada. Facebook aseméyase munches veces al patiu les cases. Nestos casos ye meyor zarrar les ventanes pa nun oyer tantes babayaes.

Si la Biblioteca Canellada sigui nesta rede social ye porque siempre hai daquién que nun abre la ventana del patiu pa cuntar les sos intimidaes, sinón la puerta pa enseñanos a ser más cultos y más intelixentes. Ye'l casu de la Biblioteca Concentaina, d'El Perelló, de la escritora mexicana María García Esperón, de los maestros que trabayen coles nueves teunoloxíes, de les editoriales Trabe, Ámbitu, Suburbia, Pintar-Pintar... que tantes pallabres ya imáxenes nos regalen nesti espaciu... Xente que despierta la nuesa imaxinación, qu'almite la pluralidá llingüística y que sabe mostrar aquello que pue ser interesante pa la nuesa formación intelectual y personal. Y ente estes persones ta la escritora de Colores y más colores Mª Rosa Serdio que va poco xubió una entrevista que-y ficieron a Jairo Anibal Niño y que güei queremos compartir con vosotros y dedicar a la comunidá d'enseñantes.

DÍA DE LES LLETRES ASTURIANES

2010-05-02T19:03:00.004+02:00

http://www.academiadelallingua.com/dialletres.pdf

COLORES Y MÁS COLORES

2010-05-01T18:51:00.001+02:00

MARÍA ROSA SERDIO

2010-04-29T15:47:00.001+02:00

Entrevistamos a Mª Rosa Serdio maestra y autora de Colores y más colores

PINTAR-PINTAR

2010-04-26T11:59:00.004+02:00

Los llibros de la editorial Pintar-Pintar yá se puen mercar per Internet. Por 12 eurinos y sin movese de casa podéis tener a Deva y el pitín d' Esther García con ilustraciones de Tina García.

MIO MA, LA PIRATA

2010-04-24T22:45:00.006+02:00

Suburbia Ediciones espubliza'l cuentu Mio ma, la pirata d' Iris Díaz Trancho. Podéis lleer la noticia nel diariu dixital asturies.com

XOSÉ AMBÁS

2010-04-22T18:36:00.006+02:00

Güei recordamos la entrevista que-y ficimos a Xosé Ambás .Gracies por abrinos la puerta de la to casa.

EL CUENTACUENTOS DE PRESTA ASGAYA

2010-04-21T11:00:00.002+02:00

LA LLUNA NAMORADA

2010-04-20T11:38:00.008+02:00

El poema "La lluna namorada" pertenez al llibru Cancios pa neños desconsoñaos de Carmen Gómez Ojea

La señora Lluna
ta un poco amurniada.
Los páxaros canten
que ta namorada.
Dícenlo les ñubes,
el vientu y l'agua,
faroles y estrelles,
mientres ella calla.

Un lluceru verde
abondo charrán
contó-y a la brisa
que yera verdá,
y entóncenes ella
púnxose a soplar:
¡la lluna tien mozu!
Pero ¿quién será?
_ De xuru que'l Sol
contestó-y la viesca.
_Eso ye mentira,
dixo la Culiebra,
pues él va casase cola Primavera.
_Que cosa más fata,
rióse una pega,
pues tol mundu sabe,
y yo la primera,
que-y dio'l coral
a una princesa,
brillante y dorada
y que ye la estrella
Matutina Diana,
la más temprana
de toles hermanes
qu'allumen la Tierra.

_La señora Lluna
suspira d'amor
por un gallu negru
qu'allá abaxo vio,
baillando col vientu,
tra, tra, tre, tri, tro,
d'un llau pal otru
como un mirasol.
La ratona sabia
asina faló.
Y el coneyu blancu
esto-y añadió:

_Esi gallu negru
nun sabe cantar.
Ye un gallín de fierru.
Namás fai danciar,
según sople'l vientu.
Tro, tri, tre, tra, tra.
Tampoco tien ales
coles que volar.

Qué pena me da
la Lluna llunera,
por tar namorada,
ai, d'una veleta.

A VECES LES APARIENCIES ENGAÑEN

2010-04-19T10:18:00.003+02:00

French Roast from Piokaz on Vimeo.

CONCIERTU POLA OFICIALIDÁ

2010-04-13T11:41:00.002+02:00

El sábadu 24 d'abril a les 19:00 hores nes instalaciones de la Feria de Muestres de Xixón, tendrá llugar el XXII Conciertu pola oficialidá. Tenéis más información nel diariu dixital asturies.com

COLORES Y MÁS COLORES

2010-04-12T10:17:00.008+02:00

Colores y más colores ye un poema de Mª Rosa Serdio tornáu al asturianu pol escritor Xulio Berros.
Les ilustraciones son d' Ester Sánchez

Violeta del lliriu
Violeta la flor
Violeta la tarde
Violeta'l dolor

Azul del cielu
Azul mariñán
azul de los tos güeyos
d'azul cristal.

Esperamos grabar dientro poco a Rosa y a Ester. Mentanto, déxovos los enllaces a les entrevistes que-yos fizo la escritora mexicana María García Esperón nel so blogue:
Entrevista a Rosa Serdio
Entrevista a Ester Sánchez

Podéis descargar en pdf una guía de llectura del poema.

COSADIELLES

2010-04-11T16:22:00.011+02:00

Tien muitas fueyas
ya nun ya un árbol,
l.leva muitas l.letras
ya nun ye un bancu.

Esta cosadiella pertenez al llibru: ¿Xugamos a les cosadilles? de Xicu Monteserín y espublizáu pola Academia de la Llingua Asturiana nel añu 1986 na so coleición Escolín, 21

Una vieya con un diente llama a tola xente.

Esta otra ta sacada del llibru: Garulla. Antoloxía del ritmu de Vicente García Oliva y Severino Antuña con ilustraciones d’Olmo Gracía y espublizáu pola editorial Trabe nel añu 2007.

Nun vos perdáis a Montse Garnacho

Y nesti enllaz tenéis más cosadielles A la gueta los suaños.

MUSICAL-LANDIA

2010-04-09T11:02:00.006+02:00

Musical-Landia ye'l país más musical onde viven tolos instrumentos y toles notes musicales.

"Ellí viven toos xuntos.

Son collacios, son amigos.

Duermen, sueñen col silenciu.

Tol día musicando,

musiquen lo musical,

musical, musicaleru.

Musiquen per tol campu.

Semen notes sin parar:

redondes, blanques y negres,

corchees, semicorchees,

n'harmonía col compás.

Les fuses, les semifuses.

Toes xueguen a cantar:

DO, RE, MI, DO, RE, FA, DO, RE, MI, FA..."

Lleendo esti llibru d'Esther García descubrimos un montón de coses interesantes sobre los habitantes de Musial-Landia. Cuenta l'autora que la nota Do ye redonda como'l Sol, tien la voz ronca y ta namorada del Saxofón. La Fa duérmese nos brazos de la Pandereta y la Mi ye una mimosona. Tamién fala que'l Vigulín, fíu de Vigulinón y de Vigulina-ina, canta sones de primavera y cortexa a la Xiblata en ca La Xiblatera.

Les ilustraciones son d'Ánxelu González. Fai tiempu entrevistámoslu nel Parque Ferrera d'Avilés onde cuasi morremos de fríu. Podéis escuchar el soníu del vientu acompañando les pallabres y ver los distintos planos que se ficieron a la gueta'l sol. Si queréis conocer más trabayos d'esti ilustrador nun dexéis de visitar el so blogue y la Galería de la Biblioteca.

MENÚ DE VERSOS

2010-04-07T09:57:00.012+02:00

¿Qué comen los folgazanes?

Pescáu fritu ensin espines

Carne que nun tenga güesu

Cereces sin goña endulzaes

¿Qué comen los estudiosos?

Caldu espesu ensin tropiezos

Llibros de carne con quesu

Fueyes al carambelu.

Del llibru: Menú de versos d' Esther García con ilustraciones de Borja Sauras y espublizáu pola editorial Pintar-Pintar

POEMA

2010-04-06T12:03:00.003+02:00

Kin, 6 años. Bangladesh, India

La tierra ye una bola
xigante
enriba d'un elefante
y l'elefante marmura
nel llombu
d'una tortuga
y la tortuga
navega
nuna barca de pesca
y la barca surca un ríu
que riega tou aquel trigu
y esti trigu va medrando
peles llanaes y los campos
y el campu ye una bola
xigante
enriba d'un elefante.

Del llibru: Arroz, agua y maíz de Berta Piñán con ilustraciones d' Elena Fernández y espublizáu pola editorial Pintar-Pintar

EL PRINCIPÍN

2010-04-04T16:00:00.014+02:00

Antoine de Saint-Exupéry, El Principín, Academia de la Llingua Asturiana, Uviéu, 2002 (4ª edic), col. Escolín 7. Torna de X.Ll. García Arias.

XII

"Nel otru planeta vivía ún que siempre taba enfiláu. Esta foi una visitina cortina pero qu'amurnió muncho al Principín.

-¿Qué faes ehí?-díxo-y al borrachín que taba delantre unes botelles, vacíes unes, ensin vaciar otres.

-Bebo-retrucó pensatible'l borrachu.

-Y ¿por qué bebes?-entrugó'l Principín.

-Pa escaecer-respondió'l borrachu.

-¿Pa escaecer qué?-díxo-y el Principín dándo-y pena.

-Pa escaecer la mio vergoña-acabó por dici-y el borrachu baxando la tiesta.

-Pero ¿de qué ye la vergoña?-quixo saber el Principín por si yera a audalu.

-Vergoña de beber-dixo d'una vez el borrachu y, amusgándose, yá nun quixo dicir más nada.

Y el Principín coló ensin entendelu.

¡Qué rares son les persones mayores!, atalantaba mentanto diba viaxando.

2 D'ABRIL. DÍA DEL LLIBRU INFANTIL Y XUVENIL

2010-04-02T12:32:00.004+02:00

¡Feliz Día Internacional del Llibru Infantil y Xuvenil!

Si daquién comiera llibros n'asturianu, ¿qué vomitaría?

Güei tamién se cellebra'l nacimientu del escritor danés Hans Christian Andersen:

SITUACIÓN LLEGAL DEL ASTURIANU

2010-03-31T10:26:00.004+02:00

La Xunta pola Defensa de la Llingua y Xuristes pol Asturianu entamen una campaña pa que l'Estáu ameyore la situación llegal del Asturianu. Podéis lleer la noticia pinchando equí

PIDIENDO UN DERECHU:¡¡¡OFICIALIDÁ!!!

2010-03-30T22:32:00.003+02:00

VIOLETA MONREAL. ILUSTRADORA Y ESCRITORA

2010-03-20T18:13:00.004+01:00

L'ASTURIANU NUN YE UNA IMPOSICIÓN

2010-03-15T19:44:00.005+01:00

El día 10 de marzu lleíamos nel diariu dixital asturies.com: "Consuelo Vega: los ciudadanos nun quieren imposiciones col asturianu". Güei tamos a día 15 y entovía siguimos rumiando la noticia porque nun somos quien pescanciala.

La pallabra "imposición" ye más corriente sentila ente la xente que ta a la escontra de la normalización. Los que lluchamos pa que la Llingua Asturiana (ferramienta de comunicación y seña d'identidá) nun tea en peligru desaniciu enxamás falamos d'imposición, sinón de derechos llingüísticos.

Derechu a dirixise a l'Alministración ensin torgues; derechu a deprender la Llingua Asturiana en toles escueles dende los primeros años; derechu a que tea presente nos medios de comunicación onde vive una situación marxinal; derechu a...

L'asturianu nun ye una amenaza. La xente que nun tenemos reconocíos los nuesos derechos llingüísticos sí que nos sentimos amenazos. Amenazaos a escribir y falar nuna llingua que sí ye una imposición.

II XORNAES DE LLINGUA ASTURIANA Y EDUCACIÓN

2010-03-12T13:08:00.010+01:00

Suatea convoca les II Xornaes de Llingua Asturiana y Educación los díes 19 y 20 de marzu nel Centru Cultural d'El Llano en Xixón (Cai Ríu Oru, 37).

Podéis pinchar equí pa ver el programa.

GRACIES

2010-03-10T18:44:00.003+01:00

Pa la Biblioteca Mª Josefa Canellada ye una satisfación ver que les visites aumenten día a día. Damos les gracies a la xente qu'entra per aciu canellada.com y de les redes sociales como Twitter y Facebook, ente los que s'alcuentren los fíos y nietos qu'un día colaron al otru llau de la mar.